من الأشهر اليوم؟

ردت الفنانة شذى على هجوم المغني الشعبي عبد الباسط حمودة عليها خلال حلوله ضيفا على وائل الإبراشي في برنامج "العاشرة مساء" حيث انتقد تصريحها بأنه لم تغن في شارع الهرم وسخر من هذا التصريح.

وقامت "شذى" بالرد عليه من خلال حسابها الشخصي على "إنستجرام" قائلة : "بالنسبة للأستاذ عبد الباسط حمودة أنا سكت أول مرة وقولت راجل كبير وعيب أرد، شارع الهرم اللي بالنسبالك مقياس والموالد اللي واضح إن من كتر ماغنيت فيهم مضيقينك ، فبتحاول تعمل فيها متقبل الموضوع وبتقول وترد على نفسك ".

وتابعت:"أساسا محدش عاب على اللى بيغنوا فى موالد ولاشارع الهرم ، ماكل واحد يغنى مكان ماهو حابب، محدش يقدر يقيم حد ولايحكم على حد ..أنا فعلا محالفنيش الحظ الفظيع إنى أغنى فيهم أعملك إيه طيب؟..إنت ليه بتحاول تعمل حوار وموضوع ، للأسف ياسى عبد الباسط أنا مغنتش فى موالد ولاغنيت فى شارع الهرم ولا كنت مع اللى راحوا الهرم ولا بتنصل، والواقع إن فى إختلاف ثقافات وتربية وأسلوب".

واستكملت : "وبالنسبة لإنك فجأة عملت فيها "بيتهوفن الفن" فأنا غصب عنك فنانة مش عافية منى، ومش رأيى دا رأى الجهات المحترمة المعنية بالفن المحترم، زى دار الأوبرا اللى اتشرفت وكنت صوليست فيها.. وطبعا مش هتفهم يعنى إيه صوليست ، فهترجمهالك بلغتك يعنى بقدم "نمرة لوحدى" على أوركسترا بيقودها دكتور سليم سحاب ، وواحدة تانية كان بيرؤسها الدكتورة رتيبة الحفنى الله يرحمها".

وأضافت "شذى" قائلة: " فلو سمحت لما تطلع تاكل عيش فى البرامج، متحكيش فى المحكى وتجيب فى سيرتى وتبروز نفسك، لإنك نص معلوماتك الفنية فى الحلقة رايحة فى داهية..وطبعا أكيد مش هتفهم ولاحرف من اللى أنا كتباه ده ، لإن أساسا الأغنية اللى ضربتلك وأتعرفت بيها كنت أساسا تايه فيها..وطول مدة الأغنية مش عارف نفسك ، يعنى واحد طول الأغنية بيقول "أنا مش عارفنى أنا تهت منى" هعتب عليه فى إيه ، والنبى لما يلاقى نفسه بقى نبقى نتفاهم".