من الأشهر اليوم؟

قال موسى مصطفى موسى المرشح لرئاسة الجمهورية، إن هناك رد فعل إيجابي من الكثير من الشباب بعد ترشحه للرئاسة الجمهورية، موضحا: "الشباب عايزين ينضموا معانا والقبائل العربية مؤيدين لينا وهتعملنا مؤتمرات".

وأضاف موسى، خلال لقائه مع قناة "النيل للأخبار" اليوم الأحد: "القبائل العربية تعدادهم ضخم يصل لـ40 مليونا في مصر، والمجلس المصري للقبائل العربية يتعدى 2 مليون، وهذه المجموعات موجودة في 45 قبيلة بمحافظات مصر".

وعن خوضه الانتخابات كديكور، استنكر موسى: "لينا تاريخ سياسي مينفعش نلعب ولا نخاطر فيه، أنا داخل الانتخابات بجدية وبهدف أني فوز أي كان النتيجة، وأنا نازل الانتخابات مش شكل بس ولكني أشارك بجدية وفي نفس الوقت بثبت كل الناس اللي بتلعب بمصر".

وذكر: "أنا والرئيس عبد الفتاح السيسي في اتجاه واحد ومش أعداء، الرئيس السيسي له شعبيته وناسه وأنا داخل بفكر تنافسي شريف، وعايز أحصل على أصوات لها قيمتها ولو الرئيس السيسي فاز في الانتخابات هيكون لينا دور ونتعاون معه".

وتابع موسى: "مش عايز ألغي الدعم، وقولت لو هلغيه لازم يكون فيه أرضية تساند الناس، لكن لو مفيش حاجة فالدعم هيكون بيحافظ على حياة المواطن المصري، بس الفكرة ممكن تكون إعادة توظيف الدعم بطريقة معينة ويكون فيه فرص كتيرة للشباب".

وعن ثورة 25 يناير، قال: "تعديل ما تم في 25 يناير هو ثورة 30، وسأكرم الرئيس الأسبق محمد حسني مبارك، لأنه رجل عسكري وقام بدوره العسكري في أكتوبر والضربة الجوية مينفعش نلغيه"، مضيفا: "القنوات التي تعمل فتنة في البلد سأغلقها، والموقع الإلكتروني طالما لا يضر أحد وليس به شيء مضاد، يتكلم في السياسة زي ما هو عايز، بس لازم نحترم حرمة البيوت والناس ولا نتطاول على أحد".

وأشار موسى إلى أن "الوزير قائم على منظومة كاملة وبيختار اللي شغالين معه، ولو غلط يتقدم باستقالته، بس لو معملش كده مينفعش نمشية ونستعمله ككبش فداء، لأزم نديله فرصه ونواجهه بأخطائه"، موجها حديثه للشعب: "مصر في مرحلة حرجة ومحتاجة كل واحد فينا، وأتمنى الكل ينزل يدلي بصوته ونرد على أعداء هذا الوطن، مصر كبيرة ومهمة لينا كلنا، والمواطن المصري المسئول والمرشح الأساسي".