من الأشهر اليوم؟

آخر عمر لطيور.. ثامن الحلقات الشعرية بالفيديو في سلسلة بعنوان "أوتار" للشاعر القدير علي عبدالله خليفة من انتاج صحيفة البلاد.

وهذا نص القصيده: 

جميلٍ كان عندي طير
من الـلّي سخّره ربّي
يقول وينطق الكـلْمه
طليقٍ ، كان. يتمشٌى على كيفه
متى ما حبْ يدخل عـش..

قـفـصْ واسعْ ، يحبّة ويْـتهـنّى فيه
متى ما حبْ كان يطير..

يتمشى على كيفه..
كثير يحط على كـتـفي
عزيـزٍ كان يتربٌـى
ويتربّع وسط قلبي..
* * *
عجيبه ، كـلّـما أخرجْ .. يودّعـني

يقول لي : وين تـبّي تروح ؟

ولين أرجع يـهـلٌي بي

إذا جا الليل ، يَـسكتْ ،  يحـتـرمْ صَـمْـتي

ولا يحچي .. كأنْ يـدري

لآخر ليل أنا ساهـر

ولي طوّلتْ ، يـتْـحَـكّـكْ ويـتْـشَـغْـلـب

يقول لي : قـوم يالله نام

واقول له : ما عليك منّي..

احترمْ نـفسك وظـلْ ساكـت..

إليمن ينتهي شغلي.

يظل يضحك .. وبعد شوي

يقول لي : ما بقى لك ليل .

***

وانا أعـجـبْ ، وأستغـرب
وقول : الله يا ربّي ، أيا سُـبْحان تـدبـيـرك
فهذا الطير أدركْ ليل  .. والأنوار من حوله
وهذا الليل شارف ينتهي ويخلص .
عجيبة هالولـع بيني وبــين الطير ..
حسبته مـن طـرف أهْـلي  ..

صديقٍ رافق أيامي..

* * *
ظل الطير عايشْ عـنـدنا لسنين
كُـبَـرْ .. شَـيّـبْ .. كأنْ صارتْ عليه هموم
قليل يقول لي : مـشـتـاق
قـليـل يـصـفـّـرْ .. يـغـنّي
وكل البيت له مُـوحـشْ
يظل ساكتْ ، وأولادي يناغـونه

يقولون الأهـل : طيرك ترى تعـبان
يقول لي الطبيب اللي يداوي
طيري المهموم :
هذا الطير ما فيه شي
ولا أي مرضْ باين لحّـد الحين !
ترى طـيـرك وصل آخر عُـمُـر لطْـيـور
ترى يا شيخ ، قَـوْ عزمك ..

عليك الله ، تَـقـبّـلْ في الحقيقة الـمُـوت
طـيـركْ في العـيـادة عـنـدنا ودّعْ
توفّى ، ويا عَـجَـبْ ..
مَـسكـيـنْ كان يقول  :عـزيـزي وين ؟

علي عبدالله خليفة