من الأشهر اليوم؟

سهام البارودي- كود ////—
لابغيتي تعرف واش راك عايش فمجتمع بدائي و لا مجتمع حديث، شوف واش كاينة ديك النزعة القبلية لي كاتكون عند ولاد الوطن الواحد، ودوك الانتماءات المشتتة” هادا دكالي” لاخر صحراوي ! هادا من عندنا من العونات لاخر من آيت عطا ! و كاتلقا الأفراد ديالها كايفتاخرو بواحد الشكل غير عادي فيه بزاف ديال الشوفينية بالانتماء ديالهم لهاد القبيلة و ماشي القبيلة الاخرى و كايدخلو فشي مقارنات جوفاء كاتبين ليك بلي هاداك و لا هاديك لي كايهضرو مكسل ليهم حمار فعقلهم “ناس تازة مزيانين” “فواسة ولاد القــ****” ” كازاوا عط***” ” الشلوح صقراما” “العروبية موسخين” و هادشي كايفوت النكت و الضحك و التقجام و كايولي بنادم بصح مقتنع بأنه عندو انتماء لشي عرق أحسن من الأعراق الأخرى و انطلاقا من داك الانتماء كايعطي لراسو مجموعة من الخصائص “حنا الشلوح قراية” “حنا العروبية ناس الجودة و الكرم” ” حنا ريافة رجال” و كاينسى بالمكلخ لاخور شي حوايج اخرى لي كاتحدد علميا ومنطقيا كيفاش غاتكون الشخصية ديال الفرد، فحال ” التربية لي تربا فدارهم” و “المستوى الاجتماعي” و “المدرسة لي قرا فيها ” و “اللعاقة لي عندو و عند طاسيلتو” و لي هوما لي كايأثرو بشكل مباشر على الشخصية ديالو، بعض النظر على “الانتماء العرقي”. ولا جينا نفكرو بمنطق الانتماء العرقي آ سيموحمد، شحال من عرق گاع كاين فالمغرب لا درنا احتمال (خاطئ) بلي كاينين اعراق صافية؟
جوج؟
ثلاتة؟
عشرة؟
واش عندنا عشرة ديال الشخصيات فالمغرب و ماتبقا كوبي كولي ديال هاد العشرة ديال الشخصيات ؟!
طبعا لا !
ايوا ويريز ذا فاكين لوجيك آ صاحبي؟
المجتمعات المتخلفة كاتغيب شي حاجة سميتها المنطق و اللوغوس و كاتحضر بلاصتها العاطفة او الباثوس، هذا هوا المشكل.
فالمجتمعات المتقدمة لا! الناس كاتلقاهم متاحدين حول مفهوم واحد هوا الانتماء للدولة و سدات مدام! الدولة و كفى !كاين ” مواطن فرنسي” “مواطن ياباني” ماكاينش “مواطن دكالي” و “مواطن توتسي”، و هاد الانتماء للدولة هوا لي كايخلي الدولة تتقوى حيت كايتساواو فيها المواطنين كاملين ! كي الدكالي كي السوسي كي الريفي فالحقوق و الواجبات ! و داك الانتماء ديالك آ بعيرير لواحد العرق راه علميا و تاريخيا ماكاينش حيت گاع القبائل عبر التاريخ عرفات تنقلات و أمراض و إبادات و حروب و تزاوجات مع قبائل أخرى ! مهم نتبعوك آ بوراس و نقولو عندك “إنتماء” راه داك الانتماء ديالك لشي منطقة فالمغرب ماكايعطيكش شي امتياز على الأخرين ! لاكاتشوف راسك أمازيغي شغلك هاداك تقدر تمارس تامازيغت ديالك فواحد الإطار خاص و لا فولكلوري! تسنط لشي ديسك ديال أحوزار، تسمي راسك ففايسبوك” ماسينيسا”، تختار تجيب احيدوس بلاصة الدقة المراكشية فعرسك و صافي ! فإطار الدولة الحديثة الإنتماء ديالك “الأمازيغي” فحال فاش كاتختار تشجع ” الريال” ! ماغايصنعش منك مواطن عندو امتياز على مواطن اخر! و ماكايعطيك حتى شي قيمة مضافة.
The post ماكايناش شي حاجة اليوم سميتها الشعب ولا العرق الأمازيغي! حنا كاملين اليوم جنس هجين و كلنا “مالين الأرض” ‎ appeared first on خبيرات - Khbirate.