من الأشهر اليوم؟

ممكن ببساطة يتعامل مجلس إدارة نادي المريخ المنتخب مع قرار الوزير الولائي اليسع على إنه ونسه حكومة، يعني في ناس نافذين ومن عتاة التمكين لسه عايشين في وهم إنه الحكومة ماف أي جهة ممكن تقيف في وشها والفيفا والاتحاد ده كلام فاضي، والأكبر من الفيفا نحن قدرنا عليهو، وعشان كده ممكن الوزير يطلع قرار ويعين لجنة تسيير بنفس الشخصيات السابقة العينها ووصلت المحكمة والقرار نفسه وصل الفيفا والفيفا وصلت السودان وحذرت وشداد قال تحذير الفيفا وحذر المفوضية، لكن ونسة الحكومة في الغرف المغلقة قالت ده كلام فاضي بس القرار يطلع والوزير يعمل تعديل في القرار، وفعلا طلع قرار بتعيين لجنة تسيير مع انه قرار المجلس المنتخب مازال ساريا وفيهو محكمة شغالة، ولانه الربكة ماطبيعية، الوزير ماحل المنتخب المجلس المنتخب مرة تانية زي ما عين لجنة تسيير تانية.
بعد ما القرار بالتعيين اتذكروا انه في محكمة شغالة، طيب يعملوا شنو يعملو شنووو .. مشوا المحكمة وسحبوا القضية، ولانه الارتباك ماطبيعي نسوا انه بسحبهم للقضية أصبح آدم سوداكال رئيسا شرعيا لمجلس إدارة نادي المريخ لان شرعية رئاسته كانت مربوطة بحكم المحكمة في القضية، وبما ان القضية تم سحبها او شطبها في المحكمة اصبح الرجل الرئيس الشرعي لنادي المريخ.
لازم نؤكد إنه قرار الوزير الحالي مافيهو أي إشارة لحل المجلس المنتخب (تعيين لجن تسيير فقط)، بعد داك لما لقى نفسه في ورطة تعيين لجنة بدون حل مجلس قال استند في قراره على ماورد من المفوضية بإنهيار المجلس بالإستقالات ( الما استلمتها المفوضية)، طيب في حل للمجلس ولا لا هنا رد محمد الشيخ لانه الوزير بعد ماطلع القرار مشى المطار سافر (عمرة)، ود الشيخ قال المجلس المحلول اتحل تاني .. كيف الكلام؟ قال قرار الوزير الأول كان حالة تقديرية بعدم كفاءة المجلس عشان كده قام حلاهو، وده موضوع حسب كلام ود الشيخ قابل للصاح والغلط يقصد (تقدير الوزير)، يعني المجلس وقتها وقت الحل كان شرعي ( ماف إجابة) ..
--- أكثر